南韓日前裁決，日本企業三菱重工須就二戰時強徵奴役一事，向其中十位受害人賠償，每人獲賠超過55萬到100萬不等，為南韓嘅受害者取回公道之餘，法官亦批評日本犯下「反人類嘅非法行為」。二戰期間，被日本強徵嘅勞工不計其數，今次獲得賠償嘅，只係冰山一角。

講單案嘅歷史之前，先介紹少少背景資料。可能唔少人對三菱重工嘅認識來自汽車，除此以外，三菱重工亦係日本國防工業承包商之一，負責製造同生產太空船、火箭、坦克等物資同武器。早於二戰期間，三菱重工已經係製造日軍武器嘅主力，包括生產當時日本最大戰艦「武藏」號、神風突擊隊用嚟發動自殺式攻擊嘅主要機種零式戰鬥機、裝甲坦克車等海陸空武器。

日本二戰時將大量戰俘送到日本做苦工，用嚟填補勞工短缺。三菱涉及其中六個戰俘營，入面囚禁咗超過二千人，當中包括中國、美國、韓國人等。根據日本戰後嘅報告，當時有3000名中國人被強制奴役，其中超過700人死於日本。

而朝鮮半島1910至1945年間被日本佔領，根據官方統計，近90萬韓國人被強徵奴役，仲有無數婦女淪為性奴。回歸返今次案件，起因係有南韓人1944年起被日本強徵到三菱重工位於廣島嘅工廠奴役，後嚟仲受到原子彈爆炸波及，於是近年將三菱重工告上法庭。

其實唔單止提告嘅原訴人，唔少南韓人對三菱重工亦無好感。話說韓劇《太陽的後裔》2016年播出後熱爆，三菱睇仲女主角宋慧喬人氣勁高，重金聘請佢擔任三菱於內地嘅代言人，宋慧喬當時就以三菱重工未就強徵勞工一事道歉，拒絕「戰犯企業」開出嘅天價代言合約，甚有骨氣。

圖一係當時被奴役嘅士兵，圖二為勝訴人於法院外慶祝。圖片嚟自網絡